Օգոստոսի 25-ին ԱՄՆ Արտաքին գործոց նախարար Էնթընի Պլինքըն յայտարարած էր փորձառու դիւանագէտ Ֆիլիփ Ռիքըրը Կովկասի հարցերով բանակցութիւններուն մէջ գլխաւոր խորհրդական նշանակելուն մասին։

Այս որոշման յաջորդած էր Ատրպէյճանի ԱԳՆ հերթական անհիմն յայտարարութիւնը, ուր նշուած էր, թէ «․․․գրեթէ չգործող Մինսկի խումբը վերակենդանացնելու փորձերը կրնան յանգեցնել Ատրպէյճանի եւ Հայաստանի յարաբերութիւններու կարգաւորման գործընթացէն ԱՄՆ-ի հեռացման»։ Ատրպէյճանի ԱԳՆ-էն յայտարարած էին նաեւ, թէ «Ղարաբաղեան հակամարտութիւնը կարգաւորուած է»՝ աւելցնելով, որ հայ-ատրպէյճանական յարաբերութիւններու կարգաւորումը Լեռնային Ղարաբաղի հարցին հետ կապելը  «որեւէ կերպով չի նպաստեր այդ յարաբերութիւններու կարգաւորման»։

Համաշխարհային հանրային կապերու գրասենեակի (Bureau of Global Public Affairs) փոխխօսնակ Վետանթ Փանթըլ, անդրադառնալով ատրպէյճանական կողմի յայտարարութեան, մասնաւորապէս նշած է, որ ԱՄՆ Արտաքին գործոց նախարար Էնթընի Պլինքըն Ֆիլիփ Ռիքըրը «Կովկասի մէջ բանակցութիւններու գիծով աւագ խորհրդական  նշանակած է՝ ընդգծելու համար մեր յանձնառութիւնը Հարաւային Կովկասի մէջ խաղաղութեան հաստատման գործին մէջ։ Որպէս երկիր՝ մենք յանձնառու ենք դիւրացնելու ուղիղ երկխօսութիւնը Ատրպէյճանի եւ Հայաստանի հետ երկկողմ ու բազմակողմ մակարդակներու վրայ, ինչպէս նաեւ համախոհ գործընկերներու հետ համագործակցութեան միջոցով՝ հասնելու համար երկու երկիրներուն միջեւ համապարփակ խաղաղ կարգաւորման»: