Յոյն հնագէտներու միութիւնը (SEA) բաց նամակ հրապարակած է՝ կոչ ուղղելով ԵՈՒՆԷՍՔՕ-ի գլխաւոր տնօրէն Օտրի Ազուլէյին վճռական միջամտութիւն ցուցաբերել՝ Կ. Պոլսոյ Սուրբ Սոֆիայի տաճարը պաշտպանելու համար, կը յայտնէ «Art News»ը։

Աշխարհի կարեւորագոյն կրօնական եւ մշակութային վայրերէն մէկը՝ Սուրբ Սոֆիան, 1985-ին ԵՈՒՆԷՍՔՕ-ի Համաշխարհային ժառանգութեան կառոյց դարձած էր: Այն ի սկզբանէ որպէս եկեղեցի կառուցուած էր, սակայն 2020-ին Թուրքիոյ կառավարութիւնը խիստ վիճայարոյց որոշում կայացուց՝ այն մզկիթի վերածելով։ Ըստ Յոյն հնագէտներու միութեան, բիւզանդական դարաշրջանի տաճարը տարիներու ընթացքին վնասման եւ վանդալիզմի ենթարկուած է:

Նամակին մէջ Յոյն հնագէտներու միութիւնը խնդրած է ԵՈՒՆԷՍՔՕ-ին, որուն պաշտպանութեան տակ կը գտնուի կառոյցը, «վճռականօրէն միջամտութիւն ցուցաբերել ներկայ իրավիճակը փոխելու համար, բան մը, որ միայն վտանգներ կը ստեղծէ Սուրբ Սոֆիային համար»: Յոյն հնագէտներու միութիւնը կառոյցի ներկայ կառավարումը «աւերիչ»  անուանած է:

Սուրբ Սոֆիա, մինչեւ 1453 թուականը որպէս աշխարհի ամենամեծ քրիստոնէական տաճար ծառայած է: Այդ ժամանակ Կ. Պոլիսը գրաւուած էր Օսմանեան կայսրութեան կողմէ, իսկ Սուրբ Սոֆիան մզկիթի  վերածուած։ Այնուհետեւ 1935թ. Մուսթաֆա Քեմալ Աթաթուրքը այն թանգարանի վերածած էր։