Մենք՝ Ատրպէյճանի եւ Թուրքիոյ զինուած ուժերու կողմէ մեր բնակութեան վայրերու բռնազաւթման հետեւանքով բռնի տեղահանուած եւ Հայաստանի Հանրապետութեան ու Արցախի Հանրապետութեան այլ շրջաններու մէջ ապաստան գտած բնակիչներս, կ’ողջունենք ամերիկացի նոր համանախագահ Ֆիլիփ Ռիքըրի նշանակումը եւ ԵԱՀԿ Մինսկի խումբի աշխատանքի վերսկսումը։

2020 թուականի Սեպտեմբերի 27-ին ահաբեկչական վարձկաններու կիրառմամբ Թուրքիոյ, Ռուսիոյ եւ Ատրպէյճանի կողմէ սանձազերծած թշնամանքին հետեւանքով մենք՝ Արցախի Հանրապետութեան բնակիչներս (նաեւ նախկին ԼՂԻՄ-ի բնակիչներս) կորսնցուցինք մեր տուները, ունեցուածքը, պատմական եւ հոգեւոր արժէքները, եւ մեր հարազատներու շիրիմները այցելելու հնարաւորութիւնը։

Յոյսով ենք, որ ԵԱՀԿ Մինսկի խումբը պիտի շարունակէ իր աշխատանքը՝ հաշուի առնելով Արցախի Հանրապետութեան բնակիչներու կարծիքը, այն է՝ մեր օրինական ինքնորոշման իրաւունքը, որ արտայայտուած է մեր կողմէ 1988 թուականին եւ հաստատուած այդ իրաւունքի իրականացման համար մեր 32 տարուայ պայքարով։

Ցեղային խտրականութեան քաղաքականութիւնը, հայատեացութիւնը եւ Ատրպէյճանի ներկայիս քաղաքականութիւնը՝ ուղղուած Արցախի Հանրապետութեան տարածքը հայերէ ցեղային զտման, խաղաղ բնակչութեան դաժան սպանութիւնները, խաղաղ բնակչութեան դէմ զէնքի արգիլուած տեսակներու կիրառումը եւ Լաչինի մարդասիրական միջանցքի գրաւման եւ Բերձոր քաղաքի, Աղաւնոյ եւ Ներքին Սուս գիւղերու բնակիչներու բռնի տեղահանման հետ կապուած վերջին իրադարձութիւնները կը վկայեն այն մասին, որ Արցախի Հանրապետութեան բնակիչները կենսաբանօրէն չեն կրնար գոյատեւել Ատրպէյճանի հովանաւորութեան տակ։ Նոյնին մասին կը զգուշացնէ նաեւ Լեմկինի Ցեղասպանութեան կանխարգելման հիմնարկը, որ երկրորդ նախազգուշացումը ուղարկած է Ատրպէյճանին:

Մենք յոյսով կը սպասենք Արցախի Հանրապետութեան հիմնախնդիրի արդարացի երկարաժամկէտ լուծումը՝ միջազգային համաձայնագիրներու հիման վրայ անոր բնակիչներու իրաւունքներու պաշտպանութեան ծիրին մէջ։