ՄԱԿ-ի Գլխաւոր համախմբման կողմէ ընդունուած բանաձեւին համաձայն Օգոստոսի 30-ը սահմանուած է Բռնի անհետացումներու զոհերու միջազգային օր: «Արմէնփրէս»ի փոխանցմամբ, ՀՀ մարդու իրաւունքներու պաշտպան Քրիստինէ Գրիգորեան օրուան առթիւ ուղերձ յղած է, որուն մէջ, մասնաւորապէս, նշուած է.

«Մարդոց բռնի անհետացումները մարդու իրաւունքներու բազմակի եւ շարունակական խախտումներ են։ Անոնք կը սկսին պետութեան ներկայացուցիչներու եւ պաշտօնատար անձերու թոյլատրութեամբ կամ համաձայնութեամբ, որուն կը յաջորդէ անհետացած անձին գտնուելու վայրի ժխտումը կամ թաքցնելը:

Ցաւալիօրէն ժամանակակից աշխարհին մէջ ընթացող հակամարտութիւնները բռնի անհետացումներու յանցագործութեան համար «բարենպաստ» միջավայր  ստեղծած են, եւ մենք, դժբախտաբար, մեր օրինակով գիտենք ու կը շարունակենք կրել 44-օրեայ պատերազմի ընթացքին ու անկէ ետք այս յանցագործութեան զոհերու եւ հարազատներու ցաւն ու չմարող պայքարը:

Կարմիր խաչի միջազգային կոմիտէի 2022թ. Օգոստոսին ներկայացուցած տուեալներուն համաձայն, 2020թ. 44-օրեայ պատերազմին հետեւանքով 303 անձ Հայաստանէն տակաւին կորսուած կը համարուի»:

Արեւմտեան Հայաստանը իր զօրկցութիւնը կը յայտնէ պատերազմի ընթացքին անհետ կորսուածներու ընտանիքներուն, եւ յոյս կը յայտնէ,  որ միջազգային շարք մը կառոյցներ, այդ թուին՝ Կարմիր խաչը քայլեր պիտի ձեռնարկեն գերիներու վերադարձին եւ անհետ կորսուածներու որոնողական աշխատանքներու շարունակման համար։