Սեպտեմբերի 1-ը Հայաստանի Հանրապետութեան մէջ կը նշուի որպէս գիտելիքի օր։ Այդ օրը բազմահազար աշակերտ-ուսանողներու առջեւ իրենց դուռերը կը բանան բոլոր ուսումնական հաստատութիւնները։ Դարեր շարունակ գիտելիքն ու կրթութիւնը իրենց մեծ աւանդն  ունեցած են հայ ժողովուրդի՝ մշակոյթով ու աւանդոյթներով հարուստ պատմութեան մէջ։ Հայ ժողովուրդի բազում զաւակներ իրենց գիտելիքով ու մասնագիտութեամբ բեկումնային փոփոխութիւն մտցուցած են աշխարհի տարբեր գիտական բնագաւառներու մէջ՝ պատմութեան մէջ մնալով եզակի եւ անփոխարինելի։ Բազմաթիւ ազգեր, այդպէս ալ չունենալով սեփական այբուբէնը, հայ ազգը տակաւին 405 թուականին ունեցաւ իր այբուբէնը՝ շնորհիւ Մեսրոպ Մաշտոցի։  

Կրթութիւնն ու լուսաւորութիւնը այն կարեւորագոյն հոգեւոր սնունդն են, որով  կը սնի ու կը հարստանայ ազգը, կրթուածութիւնն ու գիտելիքը կ’առաջնորդեն ազգը՝ ա՛լ աւելի խորքային ճանչնալու սեփական հայրենիքը, պատմութիւնն ու իրաւունքները, աւելի ճիշդ կողմնորոշուելու մասնագիտական ընտրութեան մէջ եւ ա՛լ աւելի գրագէտ կերպով պաշտպանելու սեփական երկրի եւ քաղաքացիի իրաւունքները՝ միջազգային հարթակներու վրայ։