Այսօր Ախալքալաքի մէջ պիտի նշուի քաղաքի օրը։ Տօնական օրուան ընթացքին պիտի կազմակերպուին բազմաթիւ եւ բազմապիսի միջոցառումներ։ Քաղաքի օրուան նուիրուած միջոցառումը տեղի պիտի ունենայ «Խաս Պախչա» կեդրոնական զբօսայգիին մէջ։ Ախալքալաքի պիտի ժամանեն նահանգապետարանի եւ հարեւան շրջաններու ներկայացուցիչներ։

Ինչպէս կը յայտնեն քաղաքապետարանէն, ելեկտրոնային մրցոյթով յայտարարուած գումարը միջոցառման ծախսերու մօտ 20 տոկոսին համար է։ Միջոցառման ընթացքին գիւղական համայնքները պիտի ունենան իրենց տաղաւարները՝ ազգային կերակուրներով։

Տօնին ընդառաջ սկսած են քաղաքի զարդարման աշխատանքները:

Արեւմտեան Հայաստանը կը շնորհաւորէ Ախալքալաք ապրող հայերը քաղաքի օրուան առթիւ, եւ կը մաղթէ, որ մշտապէս մնան այնտեղ ու աւելի զարգացնեն հայկական այս զարմանահրաշ եւ գունագեղ քաղաքը։