Արցախի Ասկերան շրջանի Սղնախ, Մոշխմհատ, Մադաթաշէն եւ Ջրաղացներ գիւղերէն տեղահանուած 95 ընտանիք  վիճակահանութեամբ տուն ստացած են Աստղաշէն համայնքի վարչական տարածքի նորակառոյց թաղամասին մէջ:

«Պետական միջոցներով այստեղ  շուրջ 136  տուն կը կառուցուի։ Յռաջիկային  քանի մը տասնեակ ընտանիքներ նոյնպէս  առանձնատուներ պիտի ստանան այս բնակավայրուն մէջ։ Մենք կորսուածի դիմաց կը կառուցենք բազմապատիկը՝  մեր կեցութեամբ, գոյութեամբ ու արարումով Արցախը հայկական պահելու համար»,- ըսած է Արցախի պետական նախարար Արտակ Բեգլարեան։

Արցախի բնակարանային հարցերու կոմիտէի նախագահ Արմէն Մանգասարեանի խօսքով՝   կառոյցի  միամեայ գործունէութեան ընթացքին աւելի քան  1000  բնակարան տրամադրուած է  շահառուներուն։

Ասկերանի վերին ենթաշրջանի 4 համայնքէ  տեղահանուած ընտանիքներուն համար նախատեսուած նոր բնակավայրին մէջ  շինարարական աշխատանքները դեռ կը  շարունակուին: Բոլոր տուները համապատասխան գոյքով ու կահաւորմամբ շահագործման պիտի յանձնուին յառաջիկայ Յունուարին: