Օգոստոսի 30-ին Սուրիոյ հիւսիս-արեւելեան շրջանի հայ տիկնայք կազմակերպեցին «Հայ տիկնաց միութիւնը 107 տարի անց կը վերածնի» կարգախօսով  առաջին համագումարը եւ ազդարարեցին Հայ տիկնաց միութեան ստեղծումը:

Հասիչէի մէջ 150 պատուիրակներու մասնակցութեամբ կայացած համագումարին բացման խօսքով հանդէս եկաւ միութեան անդամ Լուսին Էրտնիեան, որմէ ետք տեղի ունեցաւ ֆիլմի ցուցադրութիւն՝ հայ տիկնաց կատարած աշխատանքներուն մասին։ Այնուհետեւ ելոյթներով հանդէս եկան Հայ համայնքի խորհուրդի անդամներ Լուսնակ Քաֆուրեան եւ Արփի Քասրեան ու նահատակ Նուպար Օզանեան գումարտակի անդամ Հայաստան Պերպարա։

Լուսնակ Քաֆուրեան իր  ելոյթին մէջ անդրադառնալով թրքական պետութեան կողմէ հայ ժողովուրդին նկատմամբ իրականացուած Ցեղասպանութեանը, յայտարարեց, որ իրականացուած Ցեղասպանութիւնը երբեք պիտի չմոռցուի: «Մէկուկէս միլիոն հայ  կոտորուած է, ամենադաժան յանցագործութիւնները կատարուած են կիներու նկատմամբ, կիներ վաճառած են շուկաներուն մէջ»,- իր խօսքին մէջ յիշել տուաւ Քաֆուրեան:

Նահատակ Նուպար Օզանեան գումարտակի անդամ Հայաստան Պերպարա իր ելոյթին մէջ նշելով, որ իրենք կ’աշխատին մարդու իրաւունքներու,  առեւտուրի եւ ընկերային ոլորտներու մէջ կիներու իրաւունքներու սկզբունքներուն համապատասխան,  ըսաւ. «Հայ տիկնաց միութիւնը  աշխատանք կը տանի, որպէսզի կիները պաշտպանէ բռնութենէ,  միաժամանակ կը պայքարի սեռային հաւասարութեան եւ ընկերային ասպարէզի մէջ կնոջ դերը զարգացնելու համար»: Անոր խօսքով, հայ կիները ապացուցած են, որ պատերազմական իրավիճակի մէջ կրնան զէնք վերցնել, պաշտպանել իրենց երկիրը եւ իրականացնել իրենց յեղափոխական երազանքները։

Համագումարի ընթացքին  քննարկուեցան բազմաթիւ հարցեր, որմէ ետք Հայ տիկնաց միութիւնը  ներկայացուց հռչակագիր, ուր անոնք կը դատապարտեն  զաւթիչ թրքական պետութեան եւ նոր օսմանեան կառավարութեան կողմէ տարածաշրջանի ժողովուրդներու դէմ իրականացուած յարձակումներն ու յանցագործութիւնները եւ կոչ կ’ուղղեն տարածաշրջանի ժողովուրդներուն՝ միաւորուելու նոր օսմանեան աւազակախումբերուն դէմ։

Համագումարին շնորհաւորական ուղերձներ յղած են Եզիտիներու միութիւնը, Հայ համայնքի խորհուրդի՝ Տէր Զորի պիւրոյի անդամները եւ հիւսիս-արեւելեան Սուրիոյ մէջ գործող բազմաթիւ տիկնաց հասարակական կազմակերպութիւններ:

Արեւմտեան Հայաստանը կ’ողջունէ Սուրիա ապրող հայ կիներու նախաձեռնութիւնները, որոնք կը միտին ներկայացնելու Արեւմտեան Հայաստանի մշակոյթը: Մեր բազմադարեայ մշակոյթի պահպանումը ինչպէս Արեւմտեան Հայաստանի տարածքին, այնպէս ալ անկէ դուրս, կը շարունակէ մնալ մեր ուշադրութեան կեդրոնը, իսկ նմանատիպ նախաձեռնութիւնները խթան կը հանդիսանան մշակոյթի տարածման: