Վանի Տուշպա գաւառի Այանիս ամրոցին մէջ ընթացող հնագիտական ​​պեղումներու ժամանակ առաջին անգամ յայտնաբերուած է ուրարտական ժամանակաշրջանի  թագաւորական նստավայրին պատկանող աղբավայր։ Աղբավայրին մէջ ի յայտ  եկած են կնիքներ, թալիսմաններ, անպէտք առարկաներ, գրաւոր փաստաթուղթեր, խեցեղէն իրերու կտորներ, բազմաթիւ մանր ու խոշոր եղջերաւոր կենդանիներու ոսկորներ։ Այս գտածոները իսկական գանձ են հնէաբաններու համար։ 

Յիշեցնենք, որ  Այանիսի ամրոցը  կառուցած է Արարատեան թագաւորութեան Ռուսա Բ. թագաւորը Վանի Տուշպա գաւառին մէջ՝ Վանայ լիճին նայող բլուրին վրայ։ Մօտ 2700 տարուայ վաղեմութեան այս հոյակերտ ամրոցը իր զարդաքանդակներով, աղիւսէ պատերով եւ փորագրութիւններով կը համարուի Արարատեան  թագաւորութեան ամենաշքեղ կառոյցներէն մէկը, ուր 34 տարիէ ի վեր կ’ընթանան պեղումներ եւ վերականգնողական աշխատանքներ։

Արեւմտեան Հայաստանը կ’արձանագրէ հերթական պեղումներու  արդիւնքները, փաստելով, որ փորձագիտական խումբին մէջ կրկին ընդգրկուած չէ եղած Արեւմտեան Հայաստանի ներկայացուցիչը, այս ունի մէկ բացատրութիւն՝ բոլոր գտածոները, որոնք կը յայտնաբերուին կրնան թրքական փորձագիտական խումբերու կողմէ հեշտութեամբ կեղծուիլ կամ այլափոխուիլ։