ՀՀ Արտաքին գործոց նախարար Արարատ Միրզոեան Պրիւքսէլեան հանդիպման վերաբերեալ որոշ շահարկումներու առնչութեամբ այսպիսի մեկնաբանութեամբ  հանդէս եկած է. «Հայկական կողմի տեսակէտն Ատրպէյճանի կողմէ առաջարկուած հինգ կէտերուն վերաբերեալ անփոփոխ է: Ինչպէս ըսած ենք անցեալին, 2022թ. Մարտի 10-ին Ատրպէյճանի կողմէ փոխանցուած առաջարկներուն մէջ մեզի համար անընդունելի ոչինչ կայ: Այլ բան է, որ այդ առաջարկները չեն հասցէագրեր Հայաստան-Ատրպէյճան համապարփակ խաղաղութեան օրակարգի բոլոր հարցերը: ԵԱՀԿ Մինսկի խումբի համանախագահ երկիրներուն փոխանցած մեր պատասխանով մենք լրացուցած ենք օրակարգը եւ հետեւաբար՝ այդ հենքին վրայ պատրաստ ենք խաղաղութեան բանակցութիւններու շարունակութեան: Այս տեսակէտը չլսելը կամ չլսելու փորձերը հայկական կողմին հիմք կու տան կասկածելու Ատրպէյճանի՝ խաղաղութեան հասնելու մտադրութեան անկեղծութեան մէջ։ Աւելին` բանակցութիւններու շարունակական կամայական, իրականութեան չհամապատասխանող մեկնաբանութիւնները եւ պայմանաւորուածութիւններու կատարումէ խուսափիլը թոյլ կու տան մտածելու, որ Ատրպէյճան կը միտի տապալել խաղաղութեան գործընթացը եւ ոյժի կիրառման միջոցով շարունակել ցեղային զտումներու իր քաղաքականութիւնը»:

Արեւմտեան Հայաստանը համակ ուշադրութեամբ կը հետեւի Պրիւքսէլեան գործընթացներուն, որուն մասին բազմիցս իր դիրքորոշումը  յայտնած  է Արեւմտեան Հայաստանի Հանրապետութեան նախագահ Արմենակ Աբրահամեան։ Խաղաղութեան բանակցութիւններէն առաջ նախ Հայաստանը պէտք է ունենայ սեփական օրակարգը, որով պէտք է շարժի։ Բացի անկէ, Ատրպէյճանի հետ կան տարածքային  շարք մը խնդիրներ, որոնք իրենց լուծումը չեն ստացած։ Ատրպէյճանի կողմէ կը շարունակեն բռնազաւթուած պահուիլ Շուշին, Հատրութը, եւ այլ շրջաններ 2020թ. պատերազմէն ետք, իսկ 1990-ականներէն բռնազաւթուած է Արծուաշէնը։