Արցախի Հանրապետութեան տարածքային կառավարման եւ ենթակառուցուածքներու նախարար Հայկ Խանումեան Ֆրանսայի Սենատի մեծամասնութեան ղեկավար Պրունօ Ռտայոյի հետ քննարկած է Արցախին վերաբերող հարցեր։

Այս լուրը Հայկ Խանումեան յայտնած է Ֆէյսպուքի իր էջին կատարած գրառման մէջ.

«Պարոն սենատորը Ֆրանսայի Սենատին մէջ Արցախի ճանաչման բանաձեւի զեկուցողն էր, 2021թ. Նոյեմբերին եւս հանդիպած էինք, ապա Դեկտեմբերին այցելած էր Ստեփանակերտ։ 2021թ. վերջը Ֆրանսայի Սենատին մէջ Լեռնային Ղարաբաղի հետ բարեկամութեան խումբի ստեղծման նախաձեռնողն է»,- գրած է ան։

Արեւմտեան Հայաստանը դրական կը գնահատէ Հայկ Խանումեանի հանդիպումը Պրունօ Ռտայոյի հետ, կարեւոր համարելով որեւէ համագործակցութիւն յօգուտ Արցախի։ Յիշեցնենք, որ Արեւմտեան Հայաստանի Հանրապետութեան նախագահ Արմենակ Աբրահամեան եւս աշխատանքներ կը տանի Սենատի պատգամաւորներուն հետ՝ Արցախի եւ  Արեւմտեան Հայաստանի հարցերով։