Արեւմտեան Հայաստանի Բաղէշի Ատիլճեւազ գաւառին մէջ գտնուող «թռչուններու դրախտ» անունով յայտնի Արին լիճը աստիճանաբար կը փոքրանայ, որուն պատճառը ոչ միայն երաշտն է, այլեւ՝ չվերահսկուող հորատման աշխատանքները։ Բազմաթիւ չուող թռչուններու, յատկապէս ֆլամինկոներու բնակութեան վայր հանդիսացող լիճին մէջ ջուրի մակարդակը նախորդ տարիներուն համեմատ նկատելիօրէն նուազած է, բան մը, որ լուրջ բնապահպանական վտանգ է կենդանական աշխարհին համար։ Արին լիճը յատակէն միախառնուած է Վանայ լիճին, եւ ջուրի մակարդակի նուազումը կամ բարձրացումը միաժամանակ կ’ազդէ  այս երկու լիճերու բնապահպանական համակարգին վրայ: