Արեւմտեան Հայաստանի Կարսի Կազման գաւառին մէջ գտնուող Եղեգնամօրի վանքը, որ տեղի բնակիչները կը կոչեն Չենկիլլիի եկեղեցի, սկսած է աւելի մեծ թիւով զբօսաշրջիկներ գրաւել։

Չենկիլլի գիւղին մէջտեղը գտնուող եկեղեցին ունի խաչաձեւ գմբէթ եւ ուշագրաւ զարդաքանդակներ։

Յիշեցնենք, որ սոյն վանական համալիրը կառուցուած է 10-11-րդ դարերուն, հայ Բագրատունիներու կողմէ։ Եկեղեցին վեր կը բարձրանայ եռաստիճան հիմքի վրայ: Գլխաւոր մուտքը արեւմուտքէն է: Խորանի վերին հատուածին վրայ նկատելի են համադիր ծառերու տերեւներու եւ խաղողի որթը ուտող օձի քանդակ: Այս հատուածին վրայ նաեւ առկայ են Սուրբ Մարիամ Աստուածածինի եւ Յիսուս Քրիստոսի պատկերները: Շինութեան քանդակներու մեծ մասն այսօր չէ պահպանուած: Պատերը կառուցուած են 1մ հաստութեամբ սրբատաշ պազալտէ քարով: