Այս տարի  կը լրանայ անուանի երաժիշտ եւ խմբավար Օհան Դուրեանի ծննդեան 100-ամեակը։ Սեպտեմբերի 6-ին «Արամ Խաչատրեան» համերգասրահին մէջ տեղի  ունեցած է Օհան Դուրեանի 100-ամեակի միջոցառումներու մեկնարկին նուիրուած մամլոյ  ասուլիս:

Օհան Դուրեան այն քիչ արուեստագէտներէն էր, որ լիարժէքօրէն ընդգրկուած էր միջազգային երաժշտական կեանքին  մէջ. աշխատած է 100-է աւելի նուագախումբերու հետ եւ արժանացած ամենաբարձր գնահատանքի: 

«Սեպտեմբերի 8-ին՝ Օհան Դուրեանի ծննդեան օրը՝ ժամը 12:00-ին, Կոմիտասի անուան պանթէոնին մէջ յարգանքի տուրք պիտի մատուցուի արուեստագէտի յիշատակին: Նոյն օրը՝ ժամը 19:00-ին, նախատեսուած է աննախադէպ անակնկալով համերգ՝ «Արամ Խաչատրեան» համերգասրահին մէջ՝ Էրուարր Թոփչեանի ղեկավարութեամբ: Սեպտեմբերի 13-ին՝ ժամը 19:00-ին, Կոմիտասի անուան թանգարանին մէջ պիտի կայանայ շքեղ հանդիսութիւն. Կեդրոնական դրամատան կողմէ թողարկուած է Օհան Դուրեանի անուամբ արծաթէ յուշադրամ, որուն շնորհանդէսը պիտի կայանայ, միեւնոյն ժամանակ  Բարձր տեխնոլոկիական արդիւնաբերութեան նախարարութեան եւ «Հայ փոստ»ի կողմէ պիտի թողարկուի Օհան Դուրեանի 100-ամեակին նուիրուած նամականիշ»,- նշուած է հաղորդագրութեան մէջ:

Կրթութեան, գիտութեան, մշակոյթի եւ մարմնակրթութեան նախարարութեան տեղեկացմամբ՝ Ֆրանսայի մէջ Տեսալսողական միջազգային կազմակերպութիւնը կը թողարկէ «Համաշխարհային երաժշտարուեստի գոհարներ» խորագիրը կրող 11 ձայներիզներէ կազմուած հաւաքածու, որուն մէջ ընդգրկուած են նաեւ Օհան Դուրեանի ստեղծագործութիւնները: Օհան Դուրեան եղած է նաեւ Ֆրանսայի քաղաքացի ու Արուեստի եւ գրականութեան ֆրանսական արուեստի շքանշանակիր: