Բաղէշի Ատիլճեւազ գաւառին մէջ գտնուող Արարատեան թագաւորութեան ժամանակաշրջանի 2700-ամեայ Քէֆ ամրոցի հնագիտական ​​պեղումներու ժամանակ  յայտնաբերուած են խոհանոց եւ սպասարկման սրահներ։ 

Քէֆ ամրոցին մէջ 50 տարի առաջ սկսած պեղումները ընդհատուած էին եւ վերսկսած են անցեալ տարի: Ուրարտուի ​​Ռուսա Բ. թագաւորին կողմէ կառուցուած ամրոցը տեղակայուած է Սիփան լերան ստորոտը՝ Վանա լիճին նայող բլուրին վրայ։ 

Պեղումները կ’իրականացուին Վանի Հարիւրամեայ համալսարանի հնէաբանութեան ճիւղի դասախօս, դոկտոր Իսմայիլ Ճոշքունի գիտական ​​խորհրդատւութեան ներքոյ։

Պեղումներու ընթացքին «փիղի ոտքեր» կոչուող սիւներուն վրայ յայտնաբերուած է «ուրարտական ​​կապոյտ» ներկը, իսկ ամրոցի արեւմտեան հատուածին մէջ ի յայտ եկած են խոհանոցն ու սպասարկման սրահները։

Ամփոփելով մինչեւ օրս կատարուած աշխատանքը, Ճոշքուն այսպէս ըսած է.«Մենք

յայտնաբերած ենք նաեւ քարերով կառուցուած շինութեան 70-80սմ բարձրութեամբ պատեր, որ կը թուագրենք Ն.Ք. 2700 թուականին։ Կառոյցի ներսը յայտնաբերուածը ամենայն հաւանականութեամբ խոհանոց եղած է։ Կը կարծենք, որ ամրոցին մէջ առկայ է աւելի քան 100 սենեակ»։