Պրիւքսէլի մէջ Հայաստանի, Ատրպէյճանի եւ Եւրոպական խորհուրդի ղեկավարներու եռակողմ հանդիպման ժամանակ հայկական կողմը յուզող ամենակարեւոր հարցերուն վերաբերեալ հնարաւոր չէ եղած ընդհանուր դիրքորոշումներ արձանագրել: Վլատիվոստոկի հայ համայնքին հետ ունեցած հանդիպման ժամանակ նշած է ՀՀ վարչապետ Նիկոլ Փաշինեան:

«Խօսքը մասնաւորապէս Լեռնային Ղարաբաղի հիմնախնդիրին մասին է: Ո՞րն է Ատրպէյճանի տեսակէտը: Անոնք կը կարծեն, որ Լեռնային Ղարաբաղի խնդիրը լուծուած է, եւ այլեւս քննարկելու բան չկայ: Մեր դիրքորոշումը եւ ակնյայտօրէն նաեւ միջազգային հանրութեան դիրքորոշումը չեն համընկնին Ատրպէյճանի դիրքորոշման հետ: Ակնյայտ է, որ այդ դիրքորոշումը չի կիսեր մասնաւորապէս Ռուսիոյ Դաշնութիւնը: Իմ՝ Ռուսիա կատարած պաշտօնական այցիս ընթացքին ես եւ Ռուսիոյ նախագահը ստորագրեցինք յայտարարութիւն, ուր արձանագրուած է, որ մենք պէտք է համագործակցինք Լեռնային Ղարաբաղի  հիմնախնդիրի կարգաւորման ուղղութեամբ: Այսինքն, Ռուսիա կ’արձանագրէ, որ կայ հիմնախնդիր, որ պէտք է կարգաւորել: Եւ  այս մէկը տրամաբանական է, որովհետեւ եթէ հիմնախնդիր չըլլար, Ռուսիոյ խաղաղապահ ուժերը չէին գտնուեր Լեռնային Ղարաբաղի մէջ»,- նշած է Փաշինեան: