Պրահայի մէջ լոյս տեսած է չեխ յայտնի գրող ու ճանապարհորդ Քարէլ Հանսայի «Արեւելքի արհաւիրքները» գիրքի հայերէն քննական թարգմանութիւնը՝ «ՕՐԵՐ» եւրոպական ամսագիրի կայքէջի գլխաւոր խմբագիր, Քարլի համալսարանի դոկտորանտ Աննա Կարապետեանի աշխատասիրութեամբ։

Թարգմանիչը գրած է նաեւ գիրքի նախաբանն ու քննական թարգմանութեան հետ կապուած բացատրական յառաջաբանը, ինչպէս նաեւ մօտ 500 ծանօթագրութիւններ, որոնք ներկայացուած են գիրքին վերջը։ 

Տեղեկացնենք, որ Քարւլ Հանսայի այս գիրքը չեխերէն առաջին անգամ լոյս  տեսած է 1923 թուականին Չեխիոյ մէջ, իսկ երկրորդ անգամ վերահրատարակուած է 2006 թուականին Պրահայի մէջ:

Գիրքին մէջ Քարէլ Հանսա ոչ միայն կը ներկայացնէ հայ ժողովուրդի պատմութիւնը մինչեւ 1920-ական թուականներ, այլեւ Հայոց Ցեղասպանութեան ընթացքը, Լիբանան եւ Սուրիա ապաստանած հայ գաղթականներու կեանքն ու հայկական որբանոցները։

Օտարագիր ճանապարհորդի այս գիրքն առաջին վկայութիւններէն մէկն է Հայերու Ցեղասպանութեան մասին։