Նինոծմինտայի շրջանի Մատաթափա լիճը, որ կը  գտնուի Ջաւախքի ազգային զբօսայգիի տարածքին, կը չորնայ։ Այս տարի բաւական մեծ տարած չորցած է: Լիճի չորացման պատճառը Սամեպա գիւղի բնակիչները գլխաւորաբար եղանակային պայմանները կը համարեն, քանի որ ամրան քիչ անձրեւ տեղացած է եւ եղանակը տաք է։ Բնակիչները կը նշեն նաեւ, որ տարուէ տարի լիճի ջուրին մակարդակը կը նուազի:

Քանի մը տարիէ ի վեր Մատաթափա լիճին մէջ ամբարտակ կառուցելու ծրագիր կայ, որպէսզի ջուրի մակարդակը պահեն, բայց տակաւին ոչինչ գործարկուած է այդ ուղղութեամբ։  Վրաստանի պահպանուող տարածքներու գործակալութենէն յայտնած են, որ ամբարտակ կառուցելու համար ելեկտրոնային մրցոյթն արդէն յայտարարուած է։ Այս հանգրուանին գործակալութեան կողմէ մշակուած է անհրաժեշտ տեխնիկական յանձնարարական եւ ընթացքի մէջ են նախագծային աշխատանքները։ Լրացուցիչ մանրամասները պիտի հաղորդուին յառաջիկային:

Մատաթափա լիճը կը գտնուի Ջաւախքի բարձրաւանդակի հարաւ-արեւելեան հատուածին մէջ, ծովի մակարդակէն 2108մ բարձրութեան վրայ։ Մատաթափա կը տարբերի միւս լիճերէն թռչուններու բազմազանութեամբ, այստեղ 180 թռչնատեսակ կայ, որքան որ Ջաւախքի ազգային զբօսայգի ողջ տարածքին կայ։ Մատաթափա կը սնի ստորգետնեայ ջուրերէն, անձրեւաջուրերէն եւ ձիւնի հալոցքէն, որմէ առաջացած գետակները սկիզբ կ’առնեն Ջաւախքի լեռներէն: