Այանիս ամրոցի հնագիտական ​​պեղումներուն ժամանակ ի յայտ եկած սրահին մէջ յայտնաբերուած է մօտ 2700 տարուայ հնութեան ամբողջովին պահպանուած 

պրոնզէ զարդապնակ:

Փրոֆեսոր,  դոկտոր Մեհմէտ Ըշըքլըի ղեկավարութեամբ իրականացուող պեղումներու ընթացքին ի յայտ  եկած են իրար հետ կապուած 4 նոր սրահներ, որոնցմէ մէկուն մէջ ալ յայտնաբերուած է վերոնշեալ զարդապնակը, որ ուրարտական թագաւորական ընտանիքն օգտագործած է որպէս պատերու եւ դուռերու զարդ։

Մետաղական գտածոներուն վրայ աշխատող հնագէտ դոկտոր Օղուզ Արաս, նշելով, որ զարդը ​​պեղումներու ժամանակ յայտնաբերուած եզակի օրինակներէն  է, ըսած է.

«Ուրարտական թագաւորութիւնը հարուստ էր մետաղահանքերով,  որուն ապացոյցները մենք կը տեսնենք նմանատիպ զարդերու օրինակով: Այս գտածոն պատի զարդարանք է, որուն մէջտեղը եւ անկիւնները՝ պատին ամրացուելու համար զարդանախշեր են»։