ՀՀ Պաշտպանութեան նախարար Սուրէն Պապիկեան Սեպտեմբերի 8-ին Փենթակոնի մէջ հանդիպած է ԱՄՆ պաշտպանութեան քարտուղարի քաղաքականութեան հարցերով տեղակալ Քոլին Քահլի հետ։

Հանդիպման ընթացքին քննարկուած է հայ-ամերիկեան պաշտպանական համագործակցութեան ողջ օրակարգը, պայմանաւորուածութիւններ  ձեռք բերուած են խաղաղապահ առաքելութեան, ռազմական կրթութեան, ռազմական բժշկութեան եւ միւս ոլորտներուն մէջ փոխգործակցութեան խորացման ուղղութեամբ։ Ամերիկեան կողմին խնդրանքով ՀՀ Պաշտպանութեան նախարարը ներկայացուցած է Հայաստանի շուրջ ձեւաւորուած ռազմաքաղաքական իրադրութիւնը, այդ թուին՝ իրադրութիւնը հայ-ատրպէյճանական սահմանին։

Կողմերը կարեւորած են տարածաշրջանային երկարատեւ խաղաղութեան եւ կայունութեան  հասնելուն ուղղուած ջանքերը։ Հանդիպման ընթացքին անդրադարձ կատարուած է նաեւ փոխադարձ հետաքրքրութիւն ներկայացնող միջազգային անվտանգութեան խնդիրներուն։