Ինչպէս յայտնած էինք մեր նախորդ թողարկումներէն մէկուն ընթացքին, Գերմանիոյ մէջ այս օրերուն գումարուող Եկեղեցիներու համաշխարհային խորհուրդի 11-րդ համաժողովի ընթացքին  յատուկ անդրադարձ կատարուած է նաեւ Արցախի հարցին:

Մեծի Տանն Կիլիկիոյ կաթողիկոսութեան ազգային կեդրոնական վարչութեան անդամ, լիբանանեան համալսարանի մէջ քաղաքական գիտութիւններու եւ միջազգային օրէնքի դասախօս Նորա Պայրագթարեան ներկայացուցած է Արցախի մասին յայտարարութիւնը: Յայտարարութեան մէջ համաժողովը կը դատապարտէ Ատրպէյճանի կողմէ արցախեան 44-օրեայ նախայարձակ պատերազմն ու իր զօրակցութիւնը կը յայտնէ Արցախի ժողովուրդի ինքնորոշման իրաւունքին:

Համաժողովը դատապարտած է քիմիական զէնքի գործածութիւնն ու միջազգային օրէնքին հակասող այլ պատերազմական յանցագործութիւնները: Համաժողովը կոչով դիմած է Միացեալ ազգերու կազմակերպութեան, Եւրոպական Միութեան ու Ատրպէյճանին՝ անյապաղ ազատ արձակած բոլոր ռազմագերիները, ինչպէս նաեւ իր խորը մտահոգութիւնը  յայտնած  է Արցախի գրաւեալ շրջաններուն մէջ գտնուող սրբավայրերու եւ հայկական  մշակութային ժառանգութեան նկատմամբ ոտնձգութիւններու փաստով՝ կոչ ուղղելով ԵՈՒՆԷՍՔՕ-ին եւ միջազգային համայնքին՝ բոլոր միջոցներով պահպանել հայկական մշակութային կառոյցներն ու վայրերը:

Արցախեան հակամարտութեան արդար եւ խաղաղ լուծման համար համաժողովը կոչով դիմած է ԵԱՀԿ-ին` Մինսկի խումբի ծիրին մէջ երկխօսութիւն սկսելու շուրջ:

Արեւմտեան Հայաստանը միջազգային շարք մը հարթակներու վրայ եւս անդրադարձած է  Արցախի խնդիրին եւ Ատրպէյճանի կողմէ կատարուած ռազմական յանցագործութիւններուն։ Այս բիրտ գործողութիւնները տեղի չէին ունենար, եթէ միջազգային հանրութիւնը դատապարտեր Ատրպէյճանի սանձարձակ պահուածքը, սակայն պէտք է յիշել, որ նմանատիպ վայրագութիւնները  եղան նաեւ 1900-ականներու սկիզբը Արեւմտեան Հայաստանի մէջ՝ Թուրքիոյ կողմէ, որ վերաճեցաւ ցեղասպանութեան յստակ ծրագիրի։