Համացանցի վրայ քանի օրէ ի վեր մեծ թափով տարածուող տեսանիւթի հերոսին կը փորձէին գտնել բոլորը։ Ըստ Ատրպէյճան գտնուող հայ ռազմագերիներու շահերու ներկայացուցիչ, փաստաբան Սիրանուշ Սահակեանին, տեսանիւթի կամաւորականին անունը Տարօն էր։ Տարօն Յարութիւնի Անդրէասեան Արարատի մարզի Մխչեան գիւղէն էր, ընդամէնը 26 տարեկան։ Համագիւղացիները կը պատմեն, որ պատերազմի լուրը լսելուն պէս Ռուսիա գտնուող Տարօնը վերադարձած է հայրենիք ու կամաւորագրուած։ Տարօնին ծառայակիցներէն մէկն ալ նշեց, որ Տարօն եղած է իրենց վաշտի հրամանատարը եւ երբ Սանասարէն նահանջի հրաման տուած են, Տարօն չէ նահանջած եւ առաջ գացած է։ Յայտնի տեսանիւթը դիտելէ ետք հասկցած են, որ կամաւորականն իսկապէս Տարօնն է, քանի որ նման պահուածքը իրեն բնորոշ էր։ Տարօնին համագիւղացի Սուսաննա Գէորգեան  պատմեց, որ զոհուելու օրը Տարօն Անդրէասեան զանգած է հօրը ու ըսած, որ շրջափակման մէջ ինկած է, սակայն գերի պիտի չյանձնուի՝ նռնակով ինքզինք պիտի  պայթեցնէ։ 

Արեւմտեան Հայաստանը իր զօրակցութիւնը կը յայտնէ քաջ հայորդիի ընտանիքին եւ հարազատներուն, նշելով որ իսկապէս խիզախութիւն է միայնակ մարտընչել  քանի մը տասնեակ զինուորականաներու հետ, ամէն գինով փորձելով պահել իրեն վստահուած դիրքերը։ Տարօնին կատարածը սխրանք է, որ պէտք է յիշեն սերունդները։