Ողիմպիական խաղերու ոսկէ, արծաթէ, պրոնզէ մետալակիր Արթուր Ալեքսանեան հռչակուեցաւ աշխարհի քառակի ախոյեան: Սերպիոյ մայրաքաղաք Պելկրատի մէջ աւարտած յունահռոմէական ըմբշամարտի աշխարհի առաջնութեան 97քկ քաշայիններու եզրափակիչ գօտեմարտին կիւմրեցի ըմբիշը չորրորդ անգամ նուաճեց ոսկէ մետալ:

97քկ քաշայիններու եզրափակիչ գօտեմարտին ողիմպիական ախոյեանը մրցեցաւ 2018 թուականի աշխարհի փոխախոյեան, Եւրոպայի գործող ախոյեան պուլկարացի Քիրիլ Միլովին հետ եւ յաղթեց 5:1 արդիւնքով:

Աշխարհի քառակի ախոյեանը Հայաստանի եռագոյնով ախոյեանական շրջանը կատարեց հօր՝ Գէորգ Ալեքսանեանի հետ, որ նաեւ անոր անձնական մարզիչն է:

Արեւմտեան Հայաստանը կը շնորհաւորէ աշխարհի քառակի ախոյեան Արթուր Ալեքսանեանը եւ իր մարզչական կազմը այս  յաղթանակին առթիւ։ Աշխարհի տարբեր անկիւնները ապրող հայերը մեծ ոգեւորութեամբ եւ հպարտութեամբ հետեւած են այս գօտեմարտին, որուն յաջող ընթացքը եւ աւարտը լաւագոյն նուէրն էր ողջ հայութեան։