Հայաստանի շարժանկարի ազգային ակադեմիան «Օսքար» 95-րդ մրցանակաբաշխութեան «Լաւագոյն օտարալեզու ֆիլմ» անուանակարգին Հայաստանի կողմէ առաջադրուելու համար ընտրած է բեմադրիչ Իննա Սահակեանի «Արշալոյսի լուսաբացը» վաւերագրական-շարժապատկերային ֆիլմը։ Այս լուրը որպէս հաղորդագրութիւն  հրապարակուած է ֆիլմի «Ֆէյսպուք»ի պաշտօնական էջին:

«Այժմ, առաւել քան երբեք, կարեւոր է, որ Հայոց Ցեղասպանութիւնը վերապրածներու ձայները, ինչպէս Աւրորայինը, լսելի դառնան»,- նշուած է գրառման մէջ:

«Արշալոյսի լուսաբացը» ստեղծուած է «Բարս Մետիա»ի կողմէ (Հայաստան), Gebruder Beetz Filmproduktion-ի (Գերմանիա) եւ Artbox Laisvalaikio Klubas (Լիթուանիա) հետ համատեղ արտադրութեամբ։ 

«Մենք շնորհակալութիւն կը յայտնենք բոլոր այլ ֆոնտերուն, դրամաշնորհներուն եւ հիմնադրամներուն, որոնք օգնած են այս ֆիլմի արտադրութեան»,- ըսուած է հաղորդագրութեան մէջ:

Արեւմտեան Հայաստանը հպարտութեամբ կ’ընդգծէ այս կարեւոր ֆիլմին՝ «Օսքար»ին մասնակցելու հնարաւորութիւնը։ Այս եւս մեէկ մեծ հնարաւորութիւն է աշխարհին պատմելու, թէ ինչպէս թուրքերը հայկական բնիկ տարածքներուն մէջ կոտորեցին եւ տեղահանեցին հայերը։