ԱՄՆ Ներկայացուցիչներու պալատի խօսնակ Նենսի Փելոսի Երեւանի մէջ՝ «Գաֆէսճեան արուեստի կեդրոն»ին մէջ ելոյթ ունեցած է։ Փելոսի նշած է, որ ինք ԱՄՆ Ներկայացուցիչներու պալատի առաջին խօսնակն է, որ կ’այցելէ Հայաստան: «Ես հիմա կանգնած եմ երկու երկիրներու դրօշներու մէջտեղը, այս կը փաստէ Հայաստանի հետ մեր գործընկերութիւնը»,- ըսած է Փելոսի:

Փելոսի ընդգծած է՝ շատ հպարտ են, որ ի վերջոյ կրցան ընդունիլ Հայերու Ցեղասպանութեան մասին բանաձեւը: «Ճօ Պայտըն Հայաստանի բարեկամն է, եւ մենք հպարտ ենք, որ ան ստորագրեց, նաեւ ՀՀ վարչապետը հրաւիրեց ժողովրդավարութեան գագաթնաժողովին, որ շատ կարեւոր իրադարձութիւն էր: Այստեղ եմ ես՝ ըսելու, որ ԱՄՆ յանձնառու է աջակցիլ Հայաստանի ժողովրդավարութեան: Եւ մենք դժուարին պահերուն հայ ժողովուրդին կողքն ենք, երբ պայքար կ’ընթանայ ժողովրդավարութեան եւ միապետութեան միջեւ։ Հայաստան այն վայրն է, ուր  մենք կրնանք այս հակասութիւնները ակնառու տեսնել»,- ընդգծած է Փելոսի: