Ֆրանսայի մէջ Հայաստանի դեսպան Յասմիկ Տոլմաճեան Վերսալ քաղաքին մէջ մասնակցեցաւ Հայերու Ցեղասպանութեան զոհերու եւ յանուն Ֆրանսայի զոհուած հայ մարտիկներու յիշատակը յաւերժացնող խաչքարի տեղադրման 10-ամեակին նուիրուած հանդիսաւոր արարողութեան։ Միջոցառման ներկայ էին Վերսալի քաղաքապետ Ֆրանսուա տը Մազիէր, Հայ Առաքելական եկեղեցւոյ Ֆրանսայի թեմի առաջնորդ Հոգեշնորհ Տէր վարդապետ Գրիգոր Խաչատրեան, Ֆրանսայի ազգային ժողովի պատգամաւոր Շառլ Ռոտվէլ, Հայազգի նախկին մարտիկներու եւ դիմադրութեան շարժման մասնակիցներու ազգային միութեան (ANACRA) նախագահ Անթուան Բաղդիկեան, ինչպէս նաեւ ֆրանսական տեղական իշխանութիւններու եւ ֆրանսահայ համայնքի ներկայացուցիչներ։

Դեսպան Տոլմաճեան երախտագիտութիւն յայտնեց Վերսալի քաղաքային իշխանութիւններուն՝ հայ-ֆրանսական բազմադարեան բարեկամութեան ուղղուած շարունակական ջանքերուն համար։ Ան ընդգծեց, որ Հայերու դէմ իրագործուած Ցեղասպանութենէն շուրջ մէկ դար անց հայ ժողովուրդը վերստին, իր պատմական բնօրրանին մէջ կանգնած է գոյութենական սպառնալիքի առջեւ։ 

Ֆրանսա մշտապէս եղած է եւ կը մնայ հայ ժողովուրդին կողքը որպէս բարեկամ պետութիւն, եւ ՀՀ-ը պէտք է շարունակէ իր դիւանագիտական կապերը խորացնել այս երկրին հետ։