Ամերիկայի Միացեալ Նահանգներու քոնկրէսին մէջ տեղի ունեցած է Արցախի անկախութեան նուիրուած միջոցառում, որուն մասնակցած են Արցախի Հանրապետութեան Արտաքին գործոց նախարար Դաւիթ Բաբայեան, Քոնկրէսի հայկական հարցերով յանձնախումբի անդամները: Միջոցառման ընթացքին ելոյթ ունեցած է Արցախի Արտաքին գործոց նախարար Դաւիթ Բաբայեան: Ան շեշտած է, որ Արցախը երբեք պիտի չներառուի Ատրպէյճանի կազմին մէջ՝ ընդգծելով ցեղասպանական սպառնալիքները, որոնց կը բախի Արցախի ժողովուրդը: Բաբայեան շնորհակալութիւն յայտնած է ԱՄՆ-ի եւ ամբողջ աշխարհի հայկական համայնքներուն, ինչպէս նաեւ Արցախի բոլոր աջակիցներուն:

Քոնկրէսական Ատամ Շիֆ իր ելոյթին մէջ ընդգծած է, որ ԱՄՆ-ը պէտք է դադրեցնէ որեւէ տեսակի աջակցութիւն Ատրպէյճանին, պատժամիջոցներ կիրառէ եւ պատասխանատւութեան ենթարկէ Ատրպէյճանի ղեկավարութիւնը պատերազմական յանցագործութիւններուն համար: Շիֆի խօսքով, Ատրպէյճանի յարձակումը միանշանակ չդատապարտելը թոյլ տուած է, որ այդ երկիրը նոր յարձակում իրականացնէ Հայաստանի դէմ:

Միջոցառման մասնակցած է նաեւ քոնկրէսական Ֆրանկ Փալոն, որ նոր վերադարձած է Հայաստանէն: Իր ելոյթին մէջ ան ընդգծած է, որ իրենց առաքելութեան կարեւոր մասն է երաշխաւորել Հայաստանի մէջ ժողովրդավարութեան զարգացման շարունակականութիւնը՝ շեշտելով, որ Արցախն ալ անոր մէկ մասն է:

Արեւմտեան Հայաստանը ուշադիր կը հետեւի Արցախի շուրջ ծաւալուող իրադարձութիւններուն, սակայն եւս մէկ անգամ հարկ կը համարենք ընդգծել, որ Արցախը Հայաստան պետութեան մէկ մասն է։

Leave a Reply