ԳԱԱ պատուաւոր դոկտոր, քարտէզագէտ Ռուբէն Գալիչեան յայտնեց, որ Ատրպէյճան կը ցանկայ հնարաւորինս մեծցնել իր տարածքները, ընդարձակուիլ Հայաստանի հաշուին։

«Այսօր մենք ունինք քարտէզներ, զորս Հայաստան եւ Ատրպէյճան իրար մէջ վաւերացուցած են 1970 թուականին։ Ըստ այդ քարտէզներուն, Սեւ լիճն ամբողջութեամբ Հայաստանի տարածքին մէջ է, բացի փոքր շերտէ մը, Վարդենիսի այն շրջանները, ուր թշնամին գտնուած է, անոնք եղած են ՀՀ ինքնիշխան տարածքին  մէջ։ Ատրպէյճան շատ լաւ գիտէ, որ այդ քարտէզներն իրենք վաւերացուցած են, եւ լաէ գիտէ, որ ապօրինի կերպով առաջ եկած է ՀՀ տարածք։ Ցաւալին այն է, որ ՀԱՊԿ-ն ալ կը ստէ՝ նշելով, որ այդ քարտէզները յայտնի չեն, մինչդեռ Խորհրդային Միութեան շտաբն այդ քարտէզները ժամանակին գծած ու երկու կողմերուն վաւերացնել տուած է»,- նշեց Գալիչեան։

Ըստ քարտէզագէտին, եթէ Ատրպէյճան կ’ըսէ, որ նման քարտէզ գոյութիւն չունի, կը նշանակէ, որ Խորհրդային Միութեան որեեւէ երկիր այս պահուն սահմաններ չունի։

Ատրպէյճան որպէս երկիր՝ ստեղծուած է 1918 թուականին, անկէ առաջ Ատրպէյճան գոյութիւն չէ ունեցած, բացի Պարսկաստանի Ատրպատական նահանգէն։

«1918-1920 թուականներուն ՀՀ տարածքին որեւէ ատրպէյճանական միջերկիր գոյութիւն չունէր, Նախիջեւանն ալ Ատրպէյճանին չէր։ Խորհրդային տարիներուն, երբ Ստալին Ատրպէյճանին ուղղակի նուիրեց Ղարաբաղը եւ Նախիջեւանը, Ատրպէյճան այն կ’ընդունի, որովհետեւ իրենց ձեռնտու էր։ Բայց, երբ ժամանակը կու գայ սահմանները որոշելու, Ատրպէյճան կը յայտարարէ, թէ ինք Խորհրդային Ատրպէյճանի ժառանգորդը չէ»,- աւելցուց Ռուբէն Գալիչեան։

Արեւմտեան Հայաստանը չ’ընդունիր այն սահմանները, որոնք այժմ կը մատնանշուին Ատրպէյճանի կողմէ, որ ըստ ամենայնի Խորհրդային միութեան արգասիքն է: Կայ Հայաստան պետութիւն, որ ունի միջազգայնօրէն ճանչցուած սահմաններ: