ՀՀ վարչապետ Նիկոլ Փաշինեան ՄԱԿ-ի ամպիոնէն յայտարարած է, որ հայ-ատրպէյճանական սահմանի յարակից շրջաններուն մէջ միջազգային դիտորդական առաքելութեան ներկայութիւնը կարեւոր գործօն պիտի ըլլայ տարածաշրջանային կայունութեան համար։ Փաշինեան այս հարցին շուրջ խօսած է ՄԱԿ-ի գլխաւոր համախմբման 77-րդ նստաշրջանի ընթացքին ունեցած ելոյթի ժամանակ։

«Ատրպէյճան ամէն օր ուժի կը դիմէ, որպէսզի միակողմանիօրէն պարտադրէ իր ծրագիրները։ Ատրպէյճան այս մէկը կ’իրականացնէ Հայաստանի պետականութեան, անկախութեան, ժողովրդավարութեան վերջ տալու համար։ Բայց ես այստեղ եմ յայտարարելու համար, որ մենք հաստատակամօրէն  տրամադրուած ենք մեր ժողովրդավարութիւնը, անկախութիւնը, ինքնիշխանութիւնը եւ տարածքային ամբողջականութիւնը պաշտպանելու հարցին մէջ։ Կը ցանկամ ընդգծել, որ դիւանագիտական լուծումները մեր բացարձակ առաջնահերթութիւնն են։ Բացի անկէ, մենք կը համարենք, որ առաջնահերթ կարեւորութիւն ունի այս գործընթացին մէջ միջազգային հանրութեան ամբողջական ներգրաւուածութիւնը»,- մանրամասնած է ՀՀ վարչապետը։

Փաշինեան նշած է նաեւ, որ տարածաշրջանային կայունութեան ապահովման համար ատրպէյճանական զինուած ուժերը պէտք է դուրս բերուին Հայաստանի Հանրապետութեան ինքնիշխան տարածքէն։

Արեւմտեան Հայաստանը կ’ընդգծէ, որ վերջին օրերուն, Ատրպէյճանի կողմէ Արեւելեան Հայաստանի վրայ եղած է յարձակում, որ կը բնութագրուի որպէս պատերազմական գործողութիւն, այն բացառապէս յարձակում չէ, այն յստակ պատերազմ է, որուն զոհ գացին հայրենիքի պաշտպան զինուորները եւ քաղաքացիական անձեր։ ՄԱԿ-ի բարձր ամպիոնէն դիւանագիտօրէն պարտաւոր են արտաբերել պատերազմ բառը յարձակում բառին փոխարէն, որպէսզի միջազգային հանրութիւնը ճնշող մեխանիզմներ կիրառէ բռնազաւթիչ Ատրպէյճանի նկատմամբ։