Ջերմաստիճանի բարձրացման, տեղումներու նուազման եւ համաշխարհային տաքացման հետեւանքով, Վանայ լիճի ափամերձ հատուածներուն մէջ ջուրին մակարդակը պարբերաբար կը փոխուի։ Լիճի մակարդակին նուազման հետեւանքով տեսանելի դարձած է Արարատեան թագաւորութեան ժամանակաշրջանի նաւահանգիստ՝ տեղակայուած ամրոցի ափամերձ հատուածին մէջ։ Այստեղ երեւան եկած են աստիճաններ, որոնք ամրոցէն ուղիղ կ’իջնեն դէպի լիճը։ 

Դատելով  մեզի հասած տարբեր կառոյցներէն ու գտածոներէն, վստահաբար կրնանք ըսել, որ ծովագնացութիւնը զարգացած եղած է տակաւին  ուրարտական ժամանակաշրջանին։

Վանի Հարիւրամեակ համալասարանի  գրականութեան ճիւղի հնագիտութեան բաժնի վարիչ փրոֆ. դոկտ. Ռաֆէթ Չաւուշօղլու եւ Վանի թանգարանի աշխատակիցները համատեղ ուսումնասիրած են այն տարածքը, ուրկէ հնարաւոր  եղած է նաւերով բեռներ տեղափոխել։ Չաւուշօղլու նշած է, որ ի յայտ եկած նաւահանգիստը կը գտնուի Արճէշ գաւառի առափնեայ հատուածին մէջ գտնուող «Բեգերի ամրոց» կոչուող ամրոցի փէշերուն։