Հանքարդիւնաբերութեան պատճառով ալեւիներով խիտ բնակեցուած  շրջաններուն մէջ թալանն անդադար կը շարունակուի։ Մալաթիա այն շրջաններէն մէկն է, ուր նոյնպէս կ’ոչնչացուի  բնութիւնը, յատկապէս ալեւի քաղաքացիները զրկելով կենսատարածքներէ։

Մալաթիոյ բնապահպանական հարթակի Անգարայի ներկայացուցիչ Եոլտաշ Ճէյլան,

մատնանշելով շրջանին մէջ շարունակուող հանքարդիւնաբերական աշխատանքները, կ’ահազանգէ շուրջ 30 գիւղի մօտալուտ ոչնչացման մասին։ Անոր խօսքով, 

շատ հանքարդիւնաբերական ծրագիրներ կեանքի կոչուած են յատկապէս Մալաթիա, Սեբաստիա, Խարբերդ, Տերսիմ, Երզնկա, Մարաշ եւ Սամոսատ նահանգներուն մէջ: Վերոնշեալ երկաթի եւ ոսկիի հանքերուն պատճառով վտանգի տակ  յայտնուած են նաեւ ալեւիներու հաւաքատեղիներն ու ուխտատեղիները։ Եոլտաշ Ճէյլանի հաւաստմամբ, նպատակը միայն հանքարդիւնաբերութիւնը չէ: 

«Մեզ մեծ աղէտ կը սպասէ՝ Աթմա շրջանէն մինչեւ Արաբկիր գաւառ, Սարը Չիչէք սարահարթէն մինչեւ Քեմալիէ եւ Մնձուրի լեռներ։ Մենք ասոր մասին կը բարձրաձայնենք արդէն 3 տարիէ ի վեր։ Գոյութիւն ունին նաեւ օտարման փաստաթուղթեր, որոնք երկրի նախագահը հրապարակած է մէկ շաբաթ առաջ։ Իսկ այն կը նշանակէ ժողովուրդը զրկել ունեցուածքէ, յետոյ այն իւրացնել։ Այդ նախագիծերը նախ կը սկսին փոքր ծաւալով, ապա պետութեան աջակցութեամբ կ’ընդլայլեն աշխարհագրութիւնը»,- մանրամասնած է ան:

Թուրքիա նպատակ ունի ոչ միայն մեծ վնաս հասցնել Արեւմտեան Հայաստանի բնութեան, այլեւ իրականացնել քօղարկուած տեղահանութիւն՝ ալեւիները հեռացնելով այն տարածքերէն, ուր աւելի քան մէկ հարիւրամեակ  ու աւելի  ապրած են: Այս բռանազաւթիչ պետութիւնը չի հանդուրժեր մեր տարածքներուն մէջ ապրող փոքրամասնութիւնները, եւ քաղաքակիրթ աշխարհի աչքին առջեւ կ’իրագործէ իր ցեղասպան ծրագիրները: