Արեւմտեան Հայաստանի Հանրապետութեան պատուիրակութիւնը՝ նախագահ Արմենակ Աբրահամեանի գլխաւորութեամբ Սեպտեմբերի 27-ին պիտի այցելէ Եռաբլուր պանթէոն եւ Ծիծեռնակաբերդի յուշահամալիր՝ յարգանքի տուրք մատուցելու Արցախեան 44-օրեայ պատերազմի զոհերուն, ինչպէս նաեւ 1915 թուականին Օսմանեան Կայսրութեան կողմէ հայերու դէմ իրագործուած ցեղասպանութեան անմեղ զոհերու  յիշատակին առջեւ։  Պատոլւիրակութեան կազմին մէջ ներառուած են Արեւմտեան Հայաստանի Հանրապետութեան նախագահ Արմենակ Աբրահամեան, վարչապետը, կառավարութեան անդամները եւ  ԱԺ նախագահը։

Յիշեցնենք, որ 2020 թուականի Սեպտեմբերի 27-ին Ատրպէյճանի զինուժը, խախտելով  շարք մը միջազգային իրաւական նորմեր, ապօրինի կերպով յարձակում գործեց Արցախի Հանրապետութեան տարածքին վրայ։ Ատրպէյճանի սանձազերծած պատերազմին հետեւանքով հայկական կողմն ունեցաւ բազմաթիւ զոհեր, վիրաւորներ, անհետ կորսուածներ եւ ռազմագերիներ։ Վերջիններուս ճակատագիրը տակաւին  զաւթիչ Ատրպէյճանի ղեկավարութեան հայեցողութեան տակ է։