Ստեփանակերտի մէջ տեղի ունեցած է Մեսրոպ Մաշտոց համալսարանի դասախօս, երիտասարդ գրականագէտ Նանար Սիմոնեանի «Սպասում» գիրքի շնորհանդէսը:

Ինչպէս նշած են կազմակերպիչները, միջոցառումն առիթ էր վերարժեւորելու Կոմիտասը, եւս մէկ անգամ ուկնդրելու անոր ստեղծագործութիւնները:

Կոմիտասի անուան երաժշտական դպրոցի տնօրէն Զարինէ Բաբայեանի խօսքով, Վարդապետի ծննդեան օրուան նուիրուած միջոցառումն աւանդական բնոյթ կը կրէ եւ կը կազմակերպուի ամէն տարի:

«Այո՛, մենք շատ հանճարներ ունինք, որոնց անունները ոսկեայ տառերով  գրուած են պատմութեան էջերուն. Կոմիտաս, Արամ Խաչատրեան, Առնօ Բաբաջանեան, Սեւակ: Կոմիտաս ապացուցեց աշխարհին, որ հայն ունի իր երգն ու երաժշտութիւնը: Մենք պէտք է շարունակենք պահել, պահպանել ու կերտել մեր մշակոյթը՝ ապրելով ու արարելով հայրենիքի մէջ անկախ բոլոր դժուարութիւններէն»,- նշած  Զ.Բաբայեան:

Միջոցառման ընթացքին երաժշտական դպրոցի սաները ներկայացուցած են Կոմիտասի կենսագրութիւնն ու ստեղծագործական ուղին, ասմունքած ու երգած անոր ստեղծագործութիւններէն: