Փարիզի մէջ տեղի  ունեցած է ՀՀ վարչապետ Նիկոլ Փաշինեանի եւ Ֆրանսայի նախագահ Էմմանուէլ Մաքրոնի հանդիպումը: Երկու երկիրներու առաջնորդները լրատուամիջոցներու ներկայացուցիչներուն համար հանդէս  եկած են յայտարարութիւններով:

Ինչպէս կը տեղեկանանք ՀՀ վարչապետի աշխատակազմէն, Ֆրանսայի նախագահն իր խօսքին մէջ, մասնաւորապէս, նշած է. «Տիկնայք եւ պարոնայք, Հայաստանի եւ Ատրպէյճանի սահմանին տեղի ունեցած են լայնածաւալ ռազմական գործողութիւններ` տալով բազում զոհեր: Թիրախաւորուած է Հայաստանի տարածքը, քանդուած են քաղաքացիական ենթակառուցուածքներ: Այս անընդունելի իրավիճակի պայմաններուն մէջ Ֆրանսա ստանձնած է իր պարտականութիւնները: ՄԱԿ-ի ԱԽ-ին մէջ նախագահող Ֆրանսա հրաւիրեց Անվտանգութեան խորհուրդի նիստ, ուր երկու անգամ` Սեպտեմբերի 14-ին եւ 15-ին, քննարկուեցաւ իրավիճակը: Խորհուրդի անդամները պահանջեցին շուտափոյթ դադրեցնել ռազմական գործողութիւնները եւ յարգել զինադադարը: Հաշուի առնելով, որ կան գրաւուած դիրքեր` Ֆրանսա պահանջած է, որ ատրպէյճանական ուժերը վերադառնան ելման դիրքեր: Ես անձամբ Սեպտեմբերի 14-ին ըսած եմ նախագահ Ալիեւին, որ սահմանի` սահմանագծուած չըլլալու փաստը չի կրնար արդարացնել որեւէ յառաջխաղացում միւս երկրի տարածք:  Ֆրանսա համոզուած է, որ ուժի գործադրումը չի կրնար լուծում ըլլալ ոչ Հայաստանի, ոչ ալ Ատրպէյճանի համար եւ պէտք է անյապաղ վերսկսիլ երկխօսութիւնը: Բանակցութիւնները կը տարուին տարբեր ձեւաչափերով, մասնաւորապէս, ԵՄ հովանիին ներքոյ եւ պէտք է զանոնք վերսկսիլ»:

Նշենք, որ Արեւմտեան Հայաստանի նախագահն ու Արտաքին գործոց նախարարը Արեւելեան Հայաստան կատարած պաշտօնական այցի ծիրին մէջ, կը շարունակեն համագործակցութիւնը Ֆրանսացի սենատորներուն հետ՝ Երեւանի մէջ։ Անոնք դիւանագիտական ճակատին վրայ կը ներկայացնեն եւ կը պաշտպանեն ընդհանուր Հայաստանի շահերը։