«Արեւմտեան Հայաստանի մարտահրաւէրները» խորագիրը կրող  գիտաժողովի առաջին օրը տեղի ունեցաւ հանդիսաւոր բացման արարողութիւն, հնչեց Արեւմտեան Հայաստանի օրհներգը, այնուհետեւ հիւրերը մէկ վայրկեան լռութեամբ յարգեցին հայրենքի պաշպանութեան համար պատւոյ դաշտին մէջ ինկածներու յիշատակը։

Գիտաժողովին ողջոյնի խօսքով հանդէս եկաւ Արեւմտեան Հայաստանի  նախագահ Արմենակ Աբրահամեան,  առանձնացնելով այն լուրջ մարտահրաւէրները, որոնց պէտք է տրուին համապատասխան լուծումներ։ Մասնաւորապէս նշեց, որ պատմութեան կեղծիքները  բերած են Ցեղասպանութեան, եւ միայն անոնց բացայայտումն է, որ պիտի հիմնաւորէ մեր այսօրուան քաղաքականութիւնը, որ կը կառուցուի մեր բնիկութեան հիմքով։

Անդրադարձաւ Ցեղասպանութեան մասին տարածուած կեղծ դրոյթներուն, հասարակական ճգնաժամին, նշելով, որ պէտք է գտնել տարբերակներ հասարակութեան տարբեր շերտերը համախմբելու համար։ Եզրափակելով խօսքը, նախագահը ըսաւ․ «Մենք կրնանք վերականգնել մեր ինքնութիւնը՝ բնիկութեամբ, մշակոյթով, որուն կարեւոր բաղադրիչը  արեւմտահայերէն լեզուի պահպանումն ու մշտապէս օգտագործումն է։

Ելոյթով Հանդէս եկան նաեւ Արեւմտեան Հայաստանի  վարչապետը, Ազգային Ժողովի նախագահը, Արտաքին գործոց նախարարը, պատգամաւորները  եւ հրաւիրուած յատուկ հիւրերը։

Գիտաժողովի առաջին օրը ամփոփեց Ազգային Ժողովի նախագահ Նելլի Յարութիւնեան, յիշեցնելով, որ յաջորդ հանդիպումները տեղի պիտի ունենան Սեպտեմբերի 29-ին եւ 30-ին Ագաթանգեղոսի 2/2 հասցէի շէնքին մէջ։