ԱՄՆ քոնգրէսական Ճեքի Սփիըր Քոնգրէսի հայկական հարցերով յանձնախումբի անդամներ Ատամ Շիֆի, Ֆրանկ Փալոնի եւ Աննա Էշուի հետ պաշտօնապէս ներկայացուցած է Հայաստանի ու հայ ժողովուրդի դէմ Ատրպէյճանի վայրագութիւններն ու պատերազմական յանցագործութիւնները դատապարտող բանաձեւ։ 

«Շատ երկար ժամանակ Ատրպէյճան անպատիժ կերպով վայրագութիւններ իրականացուցած է հայ զինուորական ծառայողներու եւ խաղաղ բնակիչներու նկատմամբ՝ զինուորականներու մարմիններու մասնատումէն մինչեւ գլխատում, բժշկական հաստատութիւններու եւ կրօնական կառոյցներու միտումնաւոր թիրախաւորումներ։ Ատրպէյճան բազմիցս արհամարհած է մարդկային հիմնարար արժէքներն ու միջազգային իրաւունքները։ Մենք պէտք է Ալիեւի կառավարութիւը պատասխանատւութեան ենթարկենք ըստ Ժնեւի համաձայնագիրին՝ խախտումներուն եւ վայրագութիւններուն համար»,- ըսած է Սփիըր։

Սփիըրի ներկայացուցած բանաձեւին մէջ ընդգծուած է, որ Ատրպէյճան կոպտօրէն խախտած է Ժնեւի համաձայնագիրի դրոյթները։

Բանաձեւին մէջ անդրադարձ կայ նաեւ 2022 թուականի Սեպտեմբերի 13-ին Ատրպէյճանի զինուած ուժերուն կողմէ Հայաստանի վրայ յարձակման, որ կրկնութիւնն է 2020 թուականի 44-օրեայ Արցախեան պատերազմին։

Արեւմտեան Հայաստանը բարձր կը գնահատէ ԱՄՆ քոնկրէսական Ճեքի Սփիըրի եւ հայկական հարցերով յանձնախմուբի անդամներ Ատամ Շիֆի, Ֆրանկ Փալոնի ու Աննա Էշուի կատարած ծաւալուն աշխատանքը, քանի որ այս նաեւ արձագանգն է այն բանին, որ 44-օրեայ պատերազմէն ետք  ամիսներ շարունակ Արմենակ Աբրահամեան միջազգային բարձր ատեաններուն կը ներկայացնէր  այս խնդիրը, շատ խորքային դիտարկմամբ ու փաստերով։ Այս պատերազմը եւ ռազմական յանցագործութիւնները դիտաւորեալ կերպով կազմակերպուած հերթական ցեղասպանութիւնն են ուղղուած հայերուն թուրք-ատրպէյճանական դաշինքին կողմէ։