Երեւանեան գրասենեակին մէջ տեղի ունեցաւ «Արեւմտեան Հայաստանի մարտահրաւէրները» խորագիրը կրող գիտաժողովը։ 

Յիշեցնենք, որ գիտաժողովի երրորդ օրն է, որուն ընթացքին բանախօսները եւ Արեւմտեան Հայաստանի յատուկ հիւրերը հնարաւորութիւն ունեցան ամպիոնէն ներկայացնել Արեւմտեան Հայաստանի  մարտահրաւէրները, անոնց համապատասխան լուծումներ առաջարկելով։

Գիտաժողովի վերջին՝ եզրափակիչ օրը ելոյթներով հանդէս եկան Արեւմտեան Հայաստանի նախագահը, վարչապետը, պատգամաւորները եւ յատուկ հիւրերը։ Քննարկումները  գլխաւորաբար ծաւալեցան Արեւմտեան Հայաստանի ռազմավարութեան վերաբերեալ, որուն մասին իր ելոյթին մէջ յստակ դիրքորոշում յայտնեց նախագահ Արմենակ Աբրահամեան։ Ան նշեց, որ ռազմավարութեան ուղղութիւններէն մէկն ալ Արեւմտեան Հայաստանի քաղաքացութիւն ստանալն է, այնուհետեւ նոյն անձնագիրով ՀՀ քաղաքացութիւն դիւրին ստանալու հնարաւորութիւնը, բան մը, որ իրաւունքներու ամրապնդման տեսանկիւնէ կարեւորագոյն դերը կը խաղայ։ Անոր համար Արեւմտեան Հայաստանը պէտք է այս հարցով սկսի քննարկումները Հայաստանի Հանրապետութեան հետ։ Նախագահը անդրադարձաւ նաեւ Արեւմտեան Հայաստանի ներքին եւ արտաքին գործերուն, նշելով, որ ՄԱԿ-ի մէջ շուտով պիտի տեղադրուի Արեւմտեան Հայաստանի ռազմական վիճակը բնութագրող նիւթեր, ուր մանրամասնօրէն պիտի ցուցադրուին, թէ ինչ վնասներ  կրած ենք  հարեւան երկիրներու կողմէ՝ 100 տարուան ընթացքին։

Ելոյթները եզրափակեց վարչապետ տիկին Սեդա Մելիքեան, ամփոփելով գիտաժողովի 3 օրերու արդիւնքները։

Ելոյթները առաւել մանրամասն պիտի տեղադրուին Արեւմտեան Հայաստանի պետական հեռուստակայանի եութուպեան ալիքին վրայ։