«Արարատի հմայքին ներքոյ. գանձեր հին Հայաստանէն» ցուցահանդէսը հանրային քուէարկութեան արդիւնքով ճանչցուած է Հոլանտայի տարուան լաւագոյն ցուցադրութիւնը եւ ստացած առաջին մրցանակ։

Ցուցահանդէսը բացուած է 2022թ. Մայիսի 10-ին Հոլանտայի Ասսէն քաղաքի Տրենց թանգարանին մէջ ՀՀ-ի եւ Հոլանտայի միջեւ դիւանագիտական յարաբերութիւններուն հաստատման 30-ամեայ յոբելեանական միջոցառումներու ծիրին մէջ։

Նշենք, որ ցուցադրութեան ներկայացուած են Հայաստանի պատմութեան թանգարանի հնագիտական հաւաքածուէն 160 արժէքաւոր նմոյշներ, այդ թուին՝ Քարէ դարու հնագոյն շրջանէն մինչեւ քրիստոնէութեան ընդունման ժամանակահատուածին պատկանող տարբեր առարկաներ՝ զէնքեր, զարդեր, կոթողներ։ Ներկայացուած են նաեւ Քարաշամբի հնավայրէն գտնուած եզակի ծիսական արծաթեայ գաւաթը, Արտաշէս Ա. արքայի արամերէն արձանագրութեամբ սահմանաքարերէն մէկը, Տիգրան Մեծի դրամներէն, ինչպէս նաեւ թանգարանի հաւաքածուէն 17-րդ դարուն Ամսթրտամի մէջ տպագրուած Աստուածաշունչը։

Ցուցահանդէսին ներկայացուած է նաեւ Նոյեան Տապանի մասունքը` Մայր Աթոռ Սուրբ Էջմիածինի թանգարանէն։

Աշխարհին ցուցադրուող հայկական այս գլուխ գործոցներու բազում օրինակներ կան նաեւ Արեւմտեան Հայաստանի տարածքին, որոնք կ’ոչնչացուին եւ կը թալանուին Թուրքիոյ կողմէ, քաղաքկիրթ աշխարհի աչքին առջեւ։