«Արարատեան դաշնակցութիւն» մտքի կեդրոնի փորձագէտներ Ալեքսանտր Մանասեանի, Թաթուլ Մանասերեանի եւ Լարիսա Ալավերդեանի նախաձեռնութեամբ Հոկտեմբերի 5-ին, Արցախի պետական համալսարանին մէջ կազմակերպուած է քննարկում՝ արցախեան հիմնախնդիրի առանցքային հարցերուն շուրջ հանրային համաձայնութեան մասին:

Քննարկման մասնակցած են Արցախի Ազգային Ժողովի նախագահ Արթուր Թովմասեան, ԱԺ արտաքին յարաբերութիւններու մշտական յանձնաժողովի նախագահ Վահրամ Բալայեան, պատգամաւորներ Մետաքսէ Յակոբեան եւ Արամայիս Աղաբեկեան։

Արցախի  խորհրդարանի ղեկավարը ողջունելով կեդրոնի հրաւիրած քննարկումը՝ իր խօսքին մէջ ընդգծած է․ «Արցախի ապագայի շահառուն ողջ հայ ժողովուրդն է․ Հայաստանը, Արցախը եւ տարագիր հայերը պէտք է դիտարկել մէկ ամբողջութեան մէջ։ Արցախ ապրող հայերու  շահերուն հաշուին որեւէ փաստաթուղթ պէտք չէ ստորագրուի։ Մեզի համար անընդունելի է ոեւէ փաստաթուղթ, որ կրնայ անտեսել արցախեան հիմնախնդիրի կարգաւորման հեռանկարը եւ սահմանափակել Արցախի ժողովուրդի ինքնորոշման իրաւունքը»։

Քննարկման մասնակից բոլոր բանախօսները իրենց ելոյթներուն մէջ անդրադարձած  են առկայ խնդիրներուն լուծման միասնական հայեցակարգի հաստատման։

Յիշեցնենք, որ Արեւմտեան Հայաստանի Հանրապետութեան նախագահ Արմենակ Աբրահամեան իր ելոյթներէն մէկուն մէջ անդրադառնալով Արցախի խնդիրին, նշած է, որ անոր համապարփակ լուծումը կրնայ դիտարկուիլ միայն ընդհանուր Հայաստան պետութեան ծիրին մէջ, եւ չի կրնար խորհրդային որեւէ պայմանագիր գործուն դեր խաղալ այս խնդիրի ծիրին մէջ, իսկ այսօրուան քայլերը պիտի առաջնորդեն միայն փակուղի։ Պէտք է սկսիլ բազմակի համագործակցութիւն իրաւունքի ոլորտին մէջ, որ այսօր բարձր մակարդակով  կը կատարէ Արեւմտեան Հայաստանը։