2022 թուականի Հոկտեմբերի 22-ին  Մալաթիոյ Թաշխորան կոչուող երբեմնի Ս. Երրորդութիւն Եկեղեցւոյ մէջ սուրբ Պատարագ մատուցուեցաւ,  Արժ. Տ. Աւետիս Քհնյ. Թապաշեանի ձեռամբ։ Արարողութիւնը նախագահեց Պոլսոյ Հայոց Պատրիարք  Սահակ Բ. Մաշալեան։ Ս. Սեղանը սպասարկեցին Բրկ. Եուսուֆ Ուր. Դպ. Թապաշեան եւ  Սարգիս Պոյաճ։

Նորին Ամենապատւութիւնը Տէրունական Աղօթքէն առաջ քարոզ կարդաց, ողջունեց քաղաքաբնակ հաւատացեալները եւ Պոլսոյ համայնքի ողջոյնները փոխանցեց անոնց։ Հոգեւոր հայրը քարոզին մէջ շեշտը դրաւ խաղաղ համակեցութեան վրայ, առանց որուն անգամ հաւատացեալը  չի կրնար Աստուծոյ հետ յարաբերիլ։