Արցախի պաշտպանութիւնը եւ հայկական  ապագան պէտք է երաշխաւորուի համազգային ջանքերով եւ միջոցներով, ըսած է Արցախի Հանրապետութեան պետական նախարար Արտակ Բեգլարեան։

Բեգլարեանի խօսքով`  Արցախը եւ Հայաստանը պէտք է դիտարկել որպէս մէկ ամբողջականութիւն, որովհետեւ մէկ հայրենիք է, մէկ ազգ։

«Արցախը բացառիկ դեր ունի հայոց հայրենիքին ու ազգին համար։ Արցախի պաշտպանութիւնը եւ հայկական  ապագան պէտք է երաշխաւորուի համազգային ջանքերով եւ միջոցներով։ Այդ մասով Արցախի իշխանութիւնը եւ բնակչութիւնը պիտի շարունակեն իրենց հետեւողական պայքարը։ Մենք նախագահին հետ երկար քննարկումներ պէտք է ունենանք, որ հասկնանք ինչ ձեւաչափով եւ պայմաններով պէտք է բանակացութիւններ ունենանք Ատրպէյճանի հետ։ Այդ բանակցութիւններուն մասին մեր դիրքորոշումը լրացուցիչ պիտի յայտարարուի պատկան մարմիններուն կողմէ, երբ պատրաստ ըլլանք»,- ըսած է ան։

Անդրադառնալով Բերձորի եւ Աղաւնոյի բնակիչներուն, ինչպէս նաեւ միւս տեղահանուածներուն աջակցութիւն տալու հարցին, ան նշեց, որ աջակցութիւն այս ընթացքին տրամադրուած է, եւ պիտի տրամադրուի:

Արցախը ընդհանուր Հայաստան պետութեան անբաժանելի մասն է, եւ չկայ գէթ մէկ հայ, որ կրնայ այն առանձին դիտարկել։ Արցախի ազատագրման պէտք է հասնիլ ընդհանուր իրաւունքներու գործադրմամբ եւ պաշտպանութեամբ, ինչպէս նաեւ հզօր ու զինուած բանակով, որ տարածաշրջանին մէջ լաւագոյնը պիտի ըլլայ եւ պիտի ազատագրէ հայկական բոլոր տարածքները։