Հայաստանի Ամերիկեան համալսարանի Թրփանճեան գիւղական համայնքներու զարգացման ծրագիրի աջակցութեամբ 44-օրեայ պատերազմէն ետք 15 գործարարական գաղափար կեանքի կոչուած է Արցախի մէջ: Այս լուրը տեղեկացուցած է Հայաստանի Ամերիկեան համալսարանի Թրփանճեան գիւղական համայնքներու զարգացման ծրագիրի Արցախի գրասենեակի տնօրեն Լիլիթ Ղազարեան:

«Պատերազմէն առաջ Արցախի մէջ ծրագիրին աջակցութեամբ բացուած է եւ կը գործէր 155 գործարարական նախագիծ, որոնցմէ 50-ը մնացած է Ատրպէյճանի կողմէ բռնազաւթուած տարածքներուն մէջ: Յետպատերազմեան ժամանակահատուածին Արցախի գիւղական բնակավայրերուն մէջ աջակցութիւն  ցուցաբերած ենք տարբեր գործարարական ծրագիրներու իրագործման։ Ներկայիս եւս ծրագիրին դիմողներուն թիւը չէ նուազած»,- նշած է Լ. Ղազարեան: 

Թրփանճեան ծրագիրին դիմելու համար անհրաժեշտ է այցելել Արցախի գրասենեակ, լրացնել դիմում: Եթէ գործարարական գաղափարն իրատեսական է, գրասենեակէն կը հրաւիրեն մասնակցելու մէկ ամիս տեւողութեամբ դասընթացքներու ձեռնարկատիրական հմտութիւններ ձեռք բերելու կամ զանոնք զարգացնելու համար:

Լաւագոյն գնահատականի արժանացած ծրագիրները կ’երաշխաւորուին վարկաւորման Թրփանճեան ծրագիրին հետ համագործակցող դրամատուներու միջոցով:

Արեւմտեան Հայաստանը դրական կը գնահատէ նմանատիպ տարբերակով Արցախի մէջ ներդրումներ կատարելը, քանի որ այս ձեւով հնարաւորութիւն կը տրուի բնակիչներուն հանդէս գալ նախաձեռնութեամբ եւ կրթուելէ ետք միայն սկսիլ սեփական նախագիծը։ Արցախը պէտք է զարգանայ, եւ այդ մէկը ժամանակի հրամայականն է։