Խոխանաբերդը կը գտնուի Մեծ Հայքի Արցախ նահանգի Ներքին Խաչէն գաւառին մէջ, ժայռաբլուրի վրայ, ներկայիս Արցախի Հանրապետութեան Մարտակերտ շրջանի Վանք գիւղէն 4քմ հարաւ-արեւմուտք։ Բերդին մէջ կացարաններու թիւը կը գերազանցէր հիսունը։ Առանձին սենեակները առաջապահ, պաշտպանական նշանակութիւն ունէին:

Բերդին ճիշդ դիմացը Գանձասարն է, իսկ հարաւը կը բարձրանայ անտառապատ Թարխանասարը, որուն գագաթը, 13-րդ դարուն, Հասան-Ճալալ կառուցապատած եւ վերածած է անմատչելի բերդի։ Խոխանաբերդը Ներքին Խաչէնի Տէր Հասան Ճալալեաններու գլխաւոր ամրոցն էր։ Մոնղոլներու արշաւանքներու եւ ասպատակութիւններու ժամանակ գաւառի բնակչութեան մեծ մասը այնտեղ կ’ապաստանէր եւ կը պաշտպանուէր։ Վերջնականապէս աւերուած է 15-16-րդ դարերուն  աք-քոյունլու եւ քարա-քոյունլու թուրքերու արշաւանքներու ժամանակ։ Պահպանուած են պարիսպներու եւ շինութիւններու մնացորդները։