Ջրաբերդ ամրոցը կը գտնուի Արցախի Մարտակերտ շրջանին մէջ՝ Թարթառ եւ Թրղի գետերու միախառման վայրին մէջ: Տեղակայուած է հսկայածաւալ ժայռազանգուածի վրայ՝ շրջապատուած անտառոտ լեռնակոյտերով: Ամրոցը պաշտպանուած է ջրային պատնէշներով եւ գրեթէ ուղղաձիգ բարձրացող ժայռերով: Ջրաբերդ ամրոցի հիմնադրման մասին որեւէ տեղեկութիւններ մեզի չեն հասած, սակայն ամրոցին մասին յիշատակութեան կը հանդիպինք Մովսէս Կաղանկատուացի (10-րդ դար) պատմիչին «Աղուանից աշխարհի պատմութիւն» աշխատութեան մէջ: 

Ամրոցն ունի երբեմն մինչեւ ձորն իջնող բուրգաւոր պարիսպներ, որոնք ունին անկանոն յատակագիծ։ Բացի պարիսպներէն պահպանուած են նաեւ գետն իջնող թաղածածկ գետնուղիները: Այդտեղ կը գտնուի նաեւ բերդի միակ մուտքը՝ դարպասները: Ջրաբերդէն դէպի Երից Մանկանց վանական համալիր տանող փապուղին փորուած է յետպատերազմեան տարիներուն: Բացի անկէ, բերդը փոքր արահետներով կապուած  եղած է  շարք մը այլ հոգեւոր կեդրոններու (Դադիվանք, Գանձասար) եւ երեք տասնեակէ աւելի գիւղական համայնքներու հետ: Ջրաբերդ ամրոցն այդպիսով համարուած է ապաստարան եւ պաշտպանական կառոյց։