Հոկտեմբերի 25-ին, Ստեփանակերտի Մշակոյթի եւ երիտասարդութեան պալատին մէջ կայացած է Արցախի Հանրապետութեան Կրթութեան, գիտութեան, մշակոյթի եւ մարմնակրթութեան նախարարութեան կազմակերպած «Արցախեան գորգարուեստ» մրցոյթի արդիւնքներու ամփոփումը:

Գորգագէտ Աշխունջ Պօղոսեան տեղեկացուցած է, որ ընթացիկ տարուայ ամրան յայտարարուած մրցոյթին յայտ  ներկայացուցած է 38 մասնակից: Մասնակիցները՝ գլխաւորաբար Ստեփանակերտէն եւ Հադրութէն են: 

«Այս տարուան մրցոյթի արդիւնքով բացայայտեցինք ասեղնագործութեան  քանի մը իւրայատուկ նմոյշներ, որոնց հիմքին մէջ աւանդականն էր: Յաջորդ անգամ ուշադրութիւն պիտի դարձնենք գորգի գոյներուն, որպէսզի բնական ներկանիւթերէ ստանան, ինչպէս նաեւ չօգտագործուին արհեստական թելեր ու մրցոյթին չներկայացնեն նախորդ տարուան գործուածքները»,- մանրամասնած է Ա. Պօղոսեան:

Արցախի Հանրապետութեան Կրթութեան, գիտութեան, մշակոյթի եւ մարմնակրթութեան նախարարի տեղակալ Լեռնիկ Յովհաննիսեան նշած է, որ Արցախ եղած է հայոց գորգագործական կեդրոններէն մէկը:

Մրցոյթին յաղթողներու աշխատանքները պիտի պահուին ԱՀ Կրթութեան, գիտութեան, մշակոյթի եւ մարմնակրթութեան նախարարութեան ֆոնտին մէջ: