Արցախի մէջ ընթացիկ տարուան վերջը շահագործման պիտի յանձնուին բազմաթիւ բնակարաններ ու առանձնատուներ, շարք մը ասֆալտապատ ճանապարհներ: Արդէն իսկ պատրաստ են հարիւրաւոր նոր առանձնատուներէ ու տասնեակ բազմաբնակարան շէնքերէ բաղկացած նոր թաղամասերու կառուցման նախագիծեր: Նախատեսուած է լուսաւորման համակարգ անցնել Արցախը Հայաստանին կապող նոր երթուղիի երկայնքով: Արցախի քաղաքաշինութեան նախարար Արամ Սարգսեան մանրամասներ ներկայացուցած է ընթացիկ, աւարտող եւ նախատեսուող շինարարական աշխատանքներու, խնդիրներու եւ ձեռքբերումներու մասին: Անոր խօսքով, Արցախի մէջ շինարարութիւնը կ’իրականացուի մեծ մասամբ պետական պիւտճէի, նաեւ «Հայաստան» համահայկական հիմնադրամի եւ սեփական ընկերութիւններու ներդրումներով:
Արցախի ուժեղ եւ ծաղկուն ըլլալը Արեւմտեան Հայաստանի մարտահրաւէրներէն մէկն է, մենք շատ կը կարեւորենք Արցախի մէջ հայապահպանութեան ուղղուած քայլերը, որոնց կ’ուղեկցի ենթակառուցուածքներու զարգացումը։