Արեւմտեան Հայաստանի Երզնկայի Իլիչ գաւառին մէջ գործունէութիւն ծաւալող ոսկիի հանքը, որ արդիւնահանման ծաւալով երկրին մէջ երկրորդն է, օրակարգի մէջ  յայտնուած է այս տարուան Յունիս ամսուան ընթացքին տեղի ունեցած  խաժիդի խողովակի պայթումին պատճառով։

Այս հանքավայրը կ’աշխատի 2009 թուականէն, իսկ ոսկիի արտադրութիւնը սկսած  է 2010 թուականի Դեկտեմբերէն։ Ոսկիի հանքի սեփականատէրը «Անակոլտ Հանքարդիւնաբերութիւն» ընկերութիւնն է։

Ընկերութիւնը հիմնադրուած է 2000 թուականին եւ այսօր կը շարունակէ իր համագործակցութիւնը «SSR Mining» եւ «Lidya» ընկերութիւններուն հետ։

«Անակոլտ Հանքարդիւնաբերութիւն» ընկերութեան տնօրէններու խորհուրդի անդամներուն դէմ անցեալ շաբաթ հայց  ներկայացուած է Միջազգային քրէական դատարան՝ Երզնկայի Իլիչ գաւառին մէջ խաժիդի արտահոսքով պայմանաւորուած՝ «բնապահպանութեան դէմ յանցանք» եւ «մարդկութեան դէմ յանցագործութիւն» կատարելու վերաբերեալ։ 

Հայցը Միջազգային քրէական դատարան ներկայացուցած են Սետաթ Ճեզայիրլիօղլու եւ անոր կամաւոր փաստաբանը՝ Իսմայիլ Հաքքը Աթալ։

Յիշեցնենք, որ խողովակներու պայթումին հետեւանքով խաժիդը խառնուած էր բնապահպանական համակարգին եւ լեցուած Եփրատ գետը։

Արեւմտեան Հայաստանը այս հարցը բարձրաձայնած էր մեր պետական հեռուստակայանով, ինչպէս նաեւ հնչեցուցած բազմաթիւ բարձր հարթակներէ, որուն արդիւնքը այժմ կը տեսնենք: Մենք թոյլ պիտի չտանք բռնազաւթիչ Թուրքիոյ լիովին վերացնել մեր բնիկ տարածքներու  բնութիւնն ու բնապահպանական համակարգը: