Սոչիի մէջ ընդունուած յայտարարութիւնը ատրպէյճանա-արցախեան հակամարտութեան կարգաւորման «նոր շունչ»  կը բանայ, նշած է Արցախի Հանրապետութեան Արտաքին գործոց նախարար Դաւիթ Բաբայեան, մեկնաբանելով Հայաստանի, Ռուսիոյ եւ Ատրպէյճանի ղեկավարներու հանդիպման արդիւնքով նախօրէին Սոչիի մէջ ընդունուած յայտարարութիւնը։

Հարցին, թէ արդեօք փաստաթուղթը չի՞ պարունակեր ընդհանուր ձեւակերպումներ, եւ արդեօք կ’արտացոլէ՞ սպասումները, նախարարը պատասխանած է. «Lրիւ գնահատական տալու համար անհրաժեշտ է դիտարկել փաստաթուղթը զուտ մասնագիտական տեսակէտէ, ոչ միայն փաստաթուղթը, այլեւ նախորդող իրադարձութիւնները, հանդիպումէն ետք խօսուածը։ Բանակցութիւնները եւ յայտարարութիւնը ցոյց կու տան, որ Արցախեան հակամարտութիւնը լուծուած չէ։ Այո, ոչ մէկ տեղ Արցախը նշուած է, բայց նշուած չէ նաեւ այն, որ հակամարտութիւնը լուծուած է։ Ռուսիոյ նախագահը նաեւ կը նշէ, որ ամբողջ շարք մը հարցերու վերաբերեալ չեն յաջողած ընդհանուր յայտարար գտնել։ Փաստօրէն, գլխաւոր շեշտը կը դրուի տարածաշրջանին մէջ խաղաղութեան եւ կայունութեան պահպանման վրայ, եւ ժամանակի գործօնը նոյնպէս կ’ընդգծուի, որ պէտք է աշխատիլ այդ ուղղութեամբ»։

Արեւմտեան Հայաստանը կը գնահատէ այն ջանքերը, զորս կը գործադրէ բարեկամական Ռուսիա՝ տեւական խաղաղութեան հասնելու գործընթացին մէջ։ Սակայն այս բոլորին հետ մէկտեղ, միջազգային հանրութեան առջեւ՝ պէտք է հայերը ներկայացնող ոեւէ անձ գիտակցի, որ անհրաժեշտ է առաջնորդուիլ ընդհանուր Հայստանի պետական շահով, որ արդէն իսկ ամրագրուած է 20-րդ դարու սկիզբը։ Պէտք է ներկայացնել մեր իրաւունքները պաշտպանող փաթեթը հիմնուելով Սեւրի դաշնագիրի անժամանցելի փաստաթուղթին վրայ։