Ուրսուլա ֆոն տէր Լայէնի գործընկերութիւնն Ատրպէյճանի հետ` խայտառակութիւն է:

 Ուժանիւթի ճգնաժամը չի կրնար արդարացում ըլլալ, յատկապէս երբ կը բախինք իրական պատերազմական յանցագործութիւններու, յայտարարած է ֆրանսացի սենատոր Վալերի Պուայէ:

«Ֆրանսա կրնար աւելին ընել Հայաստանի համար, յատկապէս երբ մենք կը նախագահէինք Եւրոպական միութան մէջ։ Դիտորդներ ուղարկելը նուազագոյնն է, որ մենք կրնայինք ընել: Հայաստանի թշնամիները բացայայտ կերպով կ’ըսեն, որ կը ցանկան ոչնչացնել հայերը: Եւ հակառակ անոր՝ մենք կը շարունակենք ընդունիլ այդ ղեկավարները, եւ Եւրոպան Ատրպէյճանէն կազ կը գնէ Ուրսուլա ֆոն տէր Լայէնին հետ, որ կը յայտարարէ, թէ Ալիեւ յուսալի գործընկեր է»,- նշած է Պուայէ։

Անոր խօսքով, Եւրոպա արդարացիօրէն զնուորագրուած է Ուքրանիոյ համար, բայց կը լռէ Հայաստանի մասին։ «Հայերու կեանքն աւելի քի՞չ արժէ, քան ուքրանացիներուն կեանքը: Կայ Ատրպէյճանի փտած եւ ցեղապաշտ պետութիւնը, որ կը յարձակի Հայաստանի վրայ՝ ձգտելով ցեղային զտումներու եւ ցեղասպանութեան շարունակման»,- աւելցուցած է սենատորը: