Տերսիմի Հոզաթ գաւառի Շամոշի եւ Զոկար գիւղերուն մէջ անցեալ տարի «ռազմական գործողութիւներ»ու պատրուակով այրած անտառները հիմա ալ կը շարունակուին հատուիլ «վերականաչապատման» պատճառաբանութեամբ։

Իշխանութեան կողմէ կազմակերպուող այս ծառահատումները կը շարունակուին արդէն 5 ամիսէ ի վեր: Ըստ պատկան մարմիններու յայտարարութեան, ծառահատումը թուլատրուած է 30 հա տարածքի համար, սակայն կը նշուի, որ յաջորդ հխանգրուանին հատուելիք տարածքը պիտի հասնի մինչեւ 400 հա-ի։

Կտրուած ծառերը կ’արեն՝ վերածելով ածուխի, որ կը վաճառենն այլ շրջաններու մէջ։ Իշխանութիւնները կ’ըսեն, որ «կը տրեն անցեալ տարի այրած ծառերը», մինչդեռ  կը հատուին նաեւ կանաչ տերեւներով ծառերը։

Անտառներու ոչնչացումով կը վերանան նաեւ բնակավայրերը։ Յստակ կ’երեւի անցեալէն ի վեր իրականացուող ուծացման քաղաքականութիւնը, որ պիտի յանգեցնէ  Տերսիմի ամայացման՝ բնութեան ոչնչացման ճանապարհով: 

Արեւմտեան Հայաստանը կ’արձանագրէ մեր բնիկ տարածքներուն մէջ Թուրքիոյ կողմէ իրականացուող հերթական բնապահպանական յանցագործութիւնը։ Մենք բազմիցս ըսած ենք, որ բացի հողերու բռնազաւթումէն եւ բնիկ հայերու ցեղասպանումէն, Թուրքիոյ կառավարութիւնը այժմ այս կերպով կը փորձէ հարուած հասցնել մեր բնիկ տարածքներուն մէջ ապրող հայերուն, որոնք կրցած են ցեղասպանութեան տարիներուն ծպտեալ գոյատեւել։ Այս խնդիրը պէտք է ստանայ միջազգային արձագանգ, որով աւելի լրջօրէն պէտք է զբաղին բնապահպանները։